आजको युग साँच्चै नै अनौठोको छ । इसाई समाजमा प्रश्नहरूको घुइँचो देखिन्छ जुन असल कुरो
त हो तर बिडम्बना पनि हो । बाइबल हामी इसाईहरूको जिउने आधार हो र अन्तिम अधिकार हो
भन्ने ईश्वर शास्त्रीय शिक्षाका कारण आज आम विश्वासीहरू जे कुरामा पनि बाइबलले के
भन्छ भनेर प्रश्न सोधपुछ गर्ने भैसकेका छन् । अब यहाँ बिडम्बना के छ होला ?
बाइबल अनुसार जीवन
जिउनु आवश्यकता हो । बाइबल हाम्रो लागि एक सिमाना र कानून सरह हो । तर बाइबललाई के
गर्ने र के नगर्ने भन्ने कुराको निर्देशन पुस्तिका सरह सम्झनु भूल हुनेछ । बाइबलमा
सबै कुरा सिधै लेखिएको हुँदैन । बाइबल अध्ययन गरेर कतिपय नैतिकताको सवालमा हामीले आफैंले
पनि निष्कर्ष निकाल्न सक्न पर्छ । हामीले सोचेको जस्तो हरेक कार्यहरू के गर्न हुने
र नहुने भन्ने बारे बाइबलले एक-एक गरि निर्देशन नै दिन थाल्ने हो भने
बाइबलले सायद पूरा ब्रह्माण्ड नै ढाक्ने होला कि ? धेरै कुरामा हामी विश्लेषणात्मक पनि हुन आवश्यक छ !
केही उदाहरणहरू लिऔँ:
अब व्यवहारिक
नैतिकताको सवालमा चुरोट, हुक्का, ड्रग आदि जस्ता
पदार्थ सेवनको विषयमा बाइबलमा सिधै निर्देशन नहुन सक्छ । तर यसको लागि बाइबलमा
उल्लेखित नैतिकताका निर्देशनहरूबाट निष्कर्ष निकाल्न भने सकिन्छ । बाइबलमा
नैतिकताका सिद्धान्तहरू दिइएका छन् जसलाई कार्यान्वयन भने गर्न सकिन्छ । जस्तै: रोमी १४:१३-२३, १ कोरिन्थी ६:१२, ८:९, १९-२०, १०:३१, फिलिप्पी ४:८, २ पत्रुस २:१९ इत्यादि । कतिपय अवस्थामा शब्दहरूको अध्ययन गरेर अनि उक्त पदार्थको सेवन पश्चात् हुने प्रभावलाई लिएर पनि विश्लेषण गर्न सकिन्छ जस्तै रक्सी पिउन हुने नहुने
विषयमा । एफिसी ५:१८
यसैगरी पहिरनको
सम्बन्धमा पनि सामाजिक परम्परा अनुसारको आदरणीय हुने गरि लाउने कुरामा झन परमेश्वरको अघि कति आदरणीय हुनपर्छ भन्ने कुरा बाइबलबाट निष्कर्ष निकाल्न सकिन्छ । १ तिमोथी २:९-१० | जस्तै: महिलाले शीर ढाक्ने र पुरुषले
टोपी फुकाल्ने सम्बन्धमा होस् या कुनै पनि पहिरनको विषय लिएर त्यस पछाडीको सिद्धान्त,
उद्देश्य र नियतलाई विश्लेषण गरि निष्कर्षमा पुग्न सकिन्छ | बाइबलले हरेक प्रकारका
पहिरन माथि टिका-टिप्पणी गरेको छैन |
अब विज्ञान कै
सम्बन्धमा पनि बाइबलले सबै कुरो सिधै उल्लेख गरेको छैन । यद्दपी वैज्ञानिक अन्वेषणको लागि भने बाइबलले प्रेरणा दिदछ
|[1]
जस्तैः ब्रह्माण्डको सृष्टि प्रक्रिया,
आयु, भौतिक नियम, रसायनिक नियम, आदि । ब्रह्माण्ड कसरी बन्यो, सूर्य कसरी हुन आयो, यो विश्व कति प्राचीन छ, डी एन ए के हो, क्लोनिंग कस्तो
प्रक्रिया हो, आदि जस्ता थुप्रै विषयहरू खास बाइबल सित
सरोकार नै राख्दैन | बाइबलीय ईश्वरशास्त्रका एक विद्वान जोन वाल्टन अनुसार त झन
परमेश्वरले प्राचीन इस्राएलीहरूलाई उनीहरूको समझ भन्दा बाहिरको विज्ञानको भाषा
प्रयोग नै गर्नुभएको छैन |[2] त्यसैले गुरुत्त्वाकर्षण के हो भनेर बाइबललाई हैन भौतिक
विज्ञानलाई सोध्ने विषय हो तर यसको लागि धन्यवाद भने प्रभुलाई दिने हो | अय्युब
३८:३३
यस्तै परोपकारी
कार्यहरू जस्तै: अनाथ बालकलाई ग्रहण गर्ने, रक्तदान, सरसफाइ, वृक्षारोपण आदि कार्यहरूको विषयमा बाइबलमा सिधै नलेखिए पनि
आफ्नो छिमेकीलाई आफैंलाई जस्तै प्रेम गर, सृष्टिको हेरचाह गर जस्ता आज्ञाहरूबाट हामीले निष्कर्ष निकाल्न सक्छौँ । यी
कुराको लागि सिद्धान्तगत आधारहरू पनि प्रयोग गर्न सकिएला जस्तैः मानव जातीलाई
परमेश्वरले सृष्टिलाई ख्याल गर्न दिइएको छ, रगतमा जीवन छ, सरसफाइका निति नियमहरू पाउन सकिन्छ, विधवा र अनाथलाई हेरचाह गर्ने कुरा (याकुब १:२७) उल्लेख गरिएको
पाइन्छ आदि ।
बाइबलमा सबै कुरा
छर्लङ्ग नै लेखिएको हुन पर्छ भने छैन । साधारण उदाहरणका लागि विद्यालयमा विभिन्न
विषयहरूको प्रश्नावलीहरूमा सोधिएका प्रश्नहरू सबैको उत्तर पनि त सम्बन्धित पाठ भित्र सिधै हुबहु पाउन सकिन्न नि त । त्यसैले त विश्लेषण गर्न
सोधिएको हुन्छ । त्यस्तै बाइबलले पनि सबै कुरालाई हुबहु उल्लेख गर्दैन । विश्लेशनात्मक
अध्ययन आवश्यक छ साथै ईश्वरीय र सामाजिक अनुशासन सहितको स्वतन्त्रता पनि दिइनुपर्छ
|
अब धेरै विषयहरूमा
बाइबल आफैं पनि शान्त हुन सक्छ । त्यस्तो बेलामा बाइबलबाट विवाद
निम्त्याउनु भन्दा पनि आफ्नो विवेक, खोज र अनुसन्धानलाई पनि प्रयोग गर्न पर्ने हुन्छ; निष्कर्ष भन्दा पनि दायरा र सीमाना निर्धारण गर्ने । जस्तैः क्रिस्मस मनाउने कि नमनाउने र मनाउने भए कसरी मनाउने | १ कोरिन्थी
१०:३१, गलाती १:१०, २:२०, कलस्सी ३:२३, रोमी १२:१-२, २
कोरिन्थी ५:९, इत्यादि
कतिपय कुरामा
बाइबलले के गर्ने नगर्ने भन्दा पनि कसरी गर्ने भन्ने बारे पनि निर्देशन दिएको
हुन्छ । जस्तैः कुन खेल खेल्ने नखेल्ने र खेलकुदका मापदण्ड बारे बाइबलले
बताउँदैन तर खेल खेल्दा कसरी अनुशासनमा रहेर खेल्ने बारे
निश्चय नै हामीले नैतिक आधार प्रयोग गर्न सक्छौं ।
तसर्थ, आज हामीले बाइबललाई कस्तो प्रश्न गर्दै छौँ
भन्ने विषयमा पनि ख्याल गरौं । बाइबलीय हुनु ठिक हो तर ‘बाइबलवादी’ हुनु ठिक हैन ।
यसमा सबै निर्देशनहरू घोटी घोटी दिइएका छैनन् । परमेश्वरले दिनुभएको विवेक र बुद्धि
प्रयोग गरेर विश्लेषण मार्फत निष्कर्ष निकाल्ने काम बरु उचित हो ।
[1] HINDU
CHRISTIAN DEBATE – Puranas or the Holy Bible: Which Is More Scientific – ISKCON
Vs. Sakshi, 2022, accessed June 8, 2022,
https://www.youtube.com/watch?v=47tyfAp7Vbw.
[2] John
H. Walton, The Lost World of Adam and Eve: Genesis 2-3 and the Human Origins
Debate (Downers Grove: IVP Academic, 2015).